Verstandholding

"Haj noo in'n oorlog nog wal ne goeie verstandholding met de Duutsers"vroog mi'j ne Duutsen verslaggever. O zeker wal'zea ik, "ut wazzen naobers, familie, vrende, dat genk wal zo volle"
Ok nao'n oorlog was ut gauw wear in order al was de grenze af e'slottene en was der slech bi'j mekare te kommene. Maor dat heel natuurlijk wal in dawwe mekare op zien tied good de waarheid zea'n. Ok teggen vrende en familie zeg i'j wal is "I'j bunt neet wies!"
En dat worden ok teggen de Duutsers e'zeg. I'j bunt knettergek met ow'n Hitler, ut enigste waj met um kriegt is ne groten oorlog! Later vertellen ze wal is: "Ton'k daor in Rusland leepe , he'k vaake e'dach, Johan-Eume hef toch geliek e'had, ne groten oorlog dat hewwe kreggene!
Och, zee wazzen neef zo arg Hitler-achtig hier vlak ovver de grenze. Zee wazzen Katholiek en stemmen in hoofdzaak op wat noo de CDU is. Zelfs ton in Maert 1934 Hitler veur't leste verkiezingen heel en stemmen nog 90 % op de CDU. Maor 't hef ear neef e'holpene.
Maor in 't begin wollen ze zich natuurlijk groot veur doon. Ha, i'j zölt is zeen, noo maake wi'j ut. En at ze good völle Hollandse foezel op hadden dan begonnen ze daverend te zingen "Siegreich wollten wir Frankreich schlagen". Gin wonder dat ze an de Hollandse kante zea'n: Knetter verrukt buj!"
Veertien dage later stonnen ze donne op de stoepe van 't café ton net de SA der langs kwam marcheern en met ear zatte gezichte stakken ze heil-achtig den arm nao bovven en schreeuwden "Heil Moskou". Zee worden meteene op e'pakt en gengen zes weake de bak in.
Jao, der is völle verandert. Nao 1870-71 worden ut Deutse Reich op e'richt. Duutstand kreeg echt eigen geld en net as noo met de Euro kon elk land, of ut noo Westphalen, Hannover, Beyern of Saksen was er eigen Koning of zo op ut munt zetten. Dee eenheid van ut Duutse Riek brach ok ne enorme economisch opleaving in Duusland te weeg waor ok Holland good van met profiteern. Ok den Achterhook. De enorme greui van ut Ruhrgebiet vroog umme volk, en eaten, vleis, greunte, melk en botter, pearde en stro en heui. Alles kannen ze broeken. En deur de komst van de spoorweage kon ut der vlot nao t00.

Dee enorme opleaving brach ear vermoedelijk in de waan dat ze de hele wald ankonnen , met ut ongelukkige gevolg van de beide Wereldoorlogen. Maor noo gauwe wear fijn de goeie kante oet.