Foto: Achterhoek Nieuws bv
Foto: Achterhoek Nieuws bv

Lezers schrijven / Gedicht Oaver dree generaties boeren

Oaver een dree generaties boeren

Het was een klein boerderieken,
iets wieter an de diek.
Der wonen harde warkers,
ik neumen ze ome Henk en tante Riek.
Zee boerden en hee warkte wat dage butens huus.
Zee deed de varkens, hoonder, melken
en ze had nog olders thuus.
Van 's monnens vrog tot an het slaopen,
waren ze met hun beiden in de weer.
De kinder zaggen ze nauwlijks
en dat deed soms toch ok wel zeer.

De zönne wol het anders,
het was gin leaven zo.
Maor too hee met ging warken,
kreeg hee het ok neet cadeau.
Hee klopte an bie de banke
en vraog hoo völle bun ik weerd.
En ik gao het anders anpakken,
mien olders deden 't verkeerd.

Hee kreeg de gevraogde gelden
en ok wat uut de subsidie pot.
Der onston een groten ligstal, veur de beeste
en de varkens mossen vot.
De singels en de beume ,
ze stonden in de weg,
meer gres en efficiëntie,
Dat mos nao een överleg.

Der kwammen goeie jaoren,
tenminste vanaf de butenkant .
Maor tussen vader en zönne was wel eens trammelant.
Zo as de vader: den neumen een koo al vanaf kalf af an Gerdien.
Maor de zönne zei dat is olderwets,
dat is nummer honderd tien.
Zo wonnen alles anders,
meer grond en nog grotere stal.
De banke bellen maondlijks,
Het ging good, maor anders, in' 't geval ...

Noe zit de zönne op de tractor,
en protesteert töt in Den Haag an to.
Hee wil wel boeren, hee wil wel wieter,
maor wet gewoon neet hoo.
De regels wot steeds gekker,
het wark kan hee nauwelijks nog an.
Hee dech an warken butens huus, veur 't geld,
at dat teminste in nachtelijke uren kan.
Het kleine boerderiken met groten stal,
wot misschien wel te koop 'e zet.
Of is het de kringloop landbouw,
waor ze het misschien nog met red.
Maor umschakelen kost ok weer extra geld.
En de banke kik de andere kante op,
dee hef de kneupe al ' e-teld.

Met traone in de ogen,
anschouw ik de tragiek,
en denk an het ge-ööste,
en neet allene van ome Henk en tante Riek.


Hermien Bannink, Barchem

Meer berichten